မနေ့ကထုတ်ပြန်လိုက်တဲ့ ကြေညာချက်နဲ့ပတ်သက်ပြီး ကရင်နီပြည် လူငယ်များသမဂ္ဂရဲ့ ဗဟိုကော်မတီဝင် ခွန်းဘီတူးက အခုလိုပြောပါတယ်။
"ဆိုလျားကူးရွာမှာရှိတဲ့ လယ်မြေတွေကိုတော့ လူထုတွေပိုင်တယ်ဆိုတာက ကျနော်တို့ ယုံကြည်ပြီးသားပဲ၊ ဒီမြေတွေကို ပြည်သူလူထုဆီကို ချက်ခြင်းလက်ငင်းပြန်ပေးပါ၊ ပြီးရင် အခုလိုတရားစွဲဖို့ လုပ်နေတဲ့ကိစ္စကို ခုချက်ချင်းရပ်ပေးပါလို့ တောင်းဆိုပါတယ်"
ပြီးခဲ့တဲ့ မေလ ၂၇ ရက်နေ့နဲ့ ၂၈ ရက်နေ့တို့မှာ ဖရူဆိုမြို့နယ်အခြေစိုက် အမှတ် ၅၃၁ ခြေမြန်တပ်ရင်း က သိမ်းထားတဲ့ လယ်ယာမြေတွေမှာ ၀င်ရောက်ထွန်ယက်ခဲ့တဲ့ တောင်သူတွေထဲက တောင်သူ ၁၉၀ ကို ပိုင်နက်ကျူးလွန်မှုနဲ့ အမှုဖွင့်ထားတာ ဖြစ်ပါတယ်။
ပိုင်နက်ကျူးလွန်မှုနဲ့ တရားစွဲဆိုတာဟာ ဒေသခံတောင်သူတွေအပေါ် ဖိနှိပ်လိုတဲ့ လုပ်ရပ်ဖြစ်ကြောင်းနဲ့ ဆိုလျားကူးကျေးရွာက အသိမ်းခံထားရတဲ့ မြေယာပြဿနာတွေနဲ့ ပတ်သက်ပြီး အစိုးရနဲ့ လွှတ်တော်အမတ်တွေက အမြန်ဆုံးဖြေရှင်းပေးဖို့ လိုအပ်ကြောင်း အဖွဲ့ ၂၀ ကျော်က သူတို့ရဲ့ ကြေညာချက်မှာ တောင်းဆိုထားပါတယ်။
လွန်ခဲ့တဲ့ ၁၉၉၀ ခုနှစ်လောက်က ဆိုလျားကူးရွာမှာရှိတဲ့ လယ်ယာမြေ၊ စားကျက်မြေနဲ့ သစ်တောမြေ ဧက စုစုပေါင်း ၁၂၀၀ ကျော်ကို အမှတ် ၅၃၁ ခြေမြန်တပ်ရင်းက သိမ်းဆည်းခဲ့ပြီး သီးစားချထားခဲ့တာပါ။
သိမ်းဆည်းခံထားရတဲ့ အဲ့ဒီမြေတွေမှာ ၀င်ရောက်စိုက်ပျိုးမယ်ဆိုရင် တပ်ပိုင်မြေမှာ လုပ်ကိုင်တာဖြစ်ကြောင်း လက်မှတ်ရေးထိုးရမယ်လို့ စစ်တပ်က ညွှန်ကြားထားတဲ့အပေါ် ကန့်ကွက်တဲ့အနေနဲ့ ဒေသခံတောင်သူတွေက ပြီးခဲ့တဲ့ မေလ၂၇ ရက်နေ့နဲ့ ၂၈ ရက်နေ့တို့မှာ ၀င်ရောက်ထွန်ယက်ခဲ့ကြတာဖြစ်ပါတယ်။
အဲ့ဒီကြေညာချက်ကို ကရင်နီအမျိုးသား တိုးတက်ရေးပါတီ၊ ကယန်းပြည်သစ်ပါတီ၊ ကရင်နီပြည်လူမျိုးပေါင်းစုံ ပြည်သူ့လွတ်မြောက်ရေးတပ်ဦး (ကလလတ)၊ ကရင်နီပြည်လူငယ်များသမဂ္ဂ၊ ကရင်နီအမျိုးသမီး အစည်းအရုံး စတဲ့အဖွဲ့အစည်းပေါင်း ၂၀ကျော်က ပူးပေါင်းထုတ်ပြန်လိုက်တာဖြစ်ပါတယ်။
RFA Burmese
https://www.facebook.com/pages/RFA-Burmese/39218993127
No comments:
Post a Comment