ပင်လောင်းတွင် လေပြင်းကြောင့် အိမ်ခြေ ၁၀၀ ခန့် ပျက်စီး

ပင်လောင်းတွင် လေပြင်းကြောင့် အိမ်ခြေ ၁၀၀ ခန့် ပျက်စီး
===============================
ရှမ်းပြည်တောင်ပိုင်း ပင်လောင်းဒေသကို ပြီးခဲ့တဲ့ ရက်ပိုင်းအတွင်း လေပြင်း ဒဏ်ခံရမှုကြောင့် အိမ်ခြေ ၁၀၀ နီးပါး ပျက်စီးခဲ့ပါတယ်။
ပင်လောင်းမြို့နယ်ထဲမှာ ဧပြီ ၂၇ ရက်နေ့က တကြိမ်၊ ဧပြီ ၂၉ ရက်နေ့က တကြိမ် စုစုပေါင်း ၂ ကြိမ် လေပြင်း တိုက်ခတ်ခဲ့တဲ့ အတွက် လိန်းလီရွာသစ်က အိမ်ခြေစုစုပေါင်း ၁၀၀ နီးပါး ပျက်စီးခဲ့ရတာပါ။
အဲဒီရွာဟာလွန်ခဲ့တဲ့ ၆ လ လောက်ကမှ ရွှေ့ပြောင်းလာတဲ့ ရွာသစ်ဖြစ်ပြီး အိမ်ခြေအများစုဟာ သွပ်မိုးထရံကာ၊ သက်ကယ်မိုးထရံကာတွေ ဖြစ်တယ်လို့ ပင်လောင်းက ကြည်ဖြူချမ်းမြေ့ လူမှုကူညီရေးအသင်းနာယက ဦးစိန်ထွန်းက ပြောပါတယ်။
လေပြင်းတိုက်မှုကြောင့် ၂၇ ရက်နေ့မှာ နေအိမ် ၆၅ လုံး ၊ ၂၉ ရက်နေ့မှာ နောက်ထပ် ၂၃ လုံး ပျက်စီးသွားကြောင်း ၊ ခိုင်ခန့်တဲ့အိမ်က ခေါင်မိုးတွေ လန်ထွက်ကုန်ပြီး တဲအိမ် အလုံးပေါင်း ၂၀ အနီးနားက လျှိုထဲ လွင့်သွားတယ်လို့ ဆိုပါတယ်။
လျှိုထဲ လွှင့်သွားတဲ့အိမ်တွေကို လေ့ကျင့်ရေးတပ်က ရဲဘော်တွေ လိုက်လံဆယ်ယူပေးနေပြီး အိမ်ပြုပြင်လို့ မပြီးသေးတဲ့အတွက် ရွာသား ၆၀ လောက် နီးစပ်ရာ ဆွေမျိုးအသိအိမ်တွေမှာ ခိုလှုံနေရတယ်လို့ ဆိုပါတယ်။
လိန်းလီရွာမှာ စုစုပေါင်း အိမ်ခြေ ၂၀၀ လောက်ရှိပြီး ရွာသားအများစုက တောင်ယာလုပ်ငန်း၊ လက်လုပ်လက်စားတွေဖြစ်တဲ့အတွက် လေဘေးသင့်ပြည်သူတွေ အကူအညီများစွာ လိုအပ်နေကြောင်း၊ သူတို့အဖွဲ့ကလည်း ရပ်ကွက်ထဲမှာ အကူငွေနဲ့ ပစ္စည်းတွေ လိုက်လံကောက်ခံနေပြီး မနက်ဖန်မှာ အိမ်တိုင်ရာရောက်သွားကူညီမယ်လို့ ဦးစိန်ထွန်းက ဒီဗွီဘီကို ပြောသွားပါတယ်။

(ဒီဗွီဘီ)