အကျိုးအမြတ်ရဖို့ စီးပွားရေးလုပ်ငန်း အကောင်အထည် ဖော်ကြပါစို့

 ငွေအရင်းအနှီး မြောက်မြားစွာ ပိုင်ဆိုင်ထားသူ အနေဖြင့် မိမိငွေကို “ငွေသေ” အနေဖြင့် ပိုင်ဆိုင်ထားမလား။ သို့မဟုတ် “ငွေရှင်” ဖြစ်အောင် စီမံမှာလား  ဆိုသည်ကို နည်းလမ်း နှစ်မျိုး စဉ်းစားနိုင်ပါသည်။ ဘဏ်မှာ အပ်နှံထားပြီး ငွေတိုးပွားအောင် ပြုလုပ်လျှင် မိမိ ပိုင်ဆိုင်သော ထိုငွေကို “ငွေသေ” ဟု ပြောနိုင်သည်။ ဘဏ်တိုးရမည် ဖြစ်၍ အတိုင်းအတာ တစ်ခုအထိ အကျိုးရရှိမည် ဖြစ်သည်။ မိမိအဖို့ ထို “ငွေသေ” မှာ ဘဏ်အတွက် ဆိုလျှင် “ငွေရှင်” ဖြစ်သွားတော့သည်။ အဘယ်ကြောင့်ဆိုသော် ဘဏ်မှာစုသော ထိုငွေသည် ဘဏ်အနေဖြင့် လည်ပတ် အလုပ် လုပ်သဖြင့် “ငွေရှင်” ဖြစ်သွားရခြင်း ဖြစ်သည်။ မိမိ ပိုင်ဆိုင်သော ထိုငွေကို လုပ်ငန်းကြီး တစ်ခု အကောင်အထည်ဖော်ရန် မိမိကိုယ်တိုင် စီမံ ဆောင်ရွက်ပါက ထိုအရင်းအနှီးသည် မိမိအတွက် “ငွေရှင်” ဖြစ်လာတော့သည်။

မိမိပိုင် ငွေများကို ရင်းနှီး မြှုပ်နှံရာတွင် စက်ရုံ တည်ထောင်ခြင်း၊ စတိုးဆိုင် ဖွင့်ခြင်း၊ Plaza များ၊ City mart များ၊ Junction များ၊ စားသောက်ဆိုင်များ၊ Restaurant များ၊ သယ်ယူပို့ဆောင်ရေး လုပ်ငန်းများ၊ လူစီးရထားများ၊ ကုန်ပစ္စည်း သယ်ယူရေး မော်တော်ယာဉ်များ၊ ရထားပို့ဆောင်ရေး စသည်ဖြင့် စီးပွားရေးလုပ်ငန်း မျိုးစုံ အကောင်အထည် ဖော်နိုင်ပေသည်။ ထိုသို့ စီးပွားရေးလုပ်ငန်း လုပ်ဆောင်ရာတွင် အကျိုးအမြတ် (Benefit) ရရှိအောင် တွက်ချက် စီမံနိုင်ရမည် ဖြစ်သည်။ လုပ်ငန်းသေးသည် ဖြစ်စေ၊ ကြီးသည်ဖြစ်စေ အကျိုးအမြတ် မည်သို့ ရှိမည်ကို သေချာစွာ ဆန်းစစ်ရမည် ဖြစ်သည်။ ရင်းနှီးရန် ကုန်ကျမည့် ငွေပမာဏ၊ အလုပ်လုပ်မည့် လူသားလုပ်အား ကုန်ကျစရိတ်၊ ရောင်းကုန်ပစ္စည်း အရေအတွက်၊ လက်ရှိ ဈေးကွက်ပေါက်ဈေး၊ ဈေးကွက် ပမာဏ စသည်ဖြင့် လေ့လာရမည် ဖြစ်သည်။ အကျိုးအမြတ် ဆန်းစစ် တွက်ချက်ပြီး စက်ရုံ တစ်ရုံအား အကောင်အထည် ဖော်သည်ဖြစ်စေ၊ ကြိုတင် တွက်ချက်မှု မပြုလုပ်ဘဲ အကောင်အထည် ဖော်သည်ဖြစ်စေ၊ ပစ္စည်း အမျိုးအစား အသစ်ကို ထုတ်လုပ်ခြင်း မဟုတ်ဘဲ အများသူငါ သမားရိုးကျ ထုတ်လုပ်နေကျ ထုတ်ကုန်ပစ္စည်း ဆိုပါက ယေဘုယျအားဖြင့် အကျိုးအမြတ် ဖြစ်ထွန်း၍သာ စက်ရုံများ တည်ထောင်သည်ဟု နားလည် သဘောထားနိုင်ပေသည်။

အသေးစိတ် ကြိုတင် တွက်ချက်လေ့လာမှု မရှိဘဲ စက်ရုံ တည်ထောင်သည် ဆိုပါစို့။ အခြား လုပ်ငန်းရှင်များ၊ စက်ရုံ တည်ထောင် အောင်မြင်သော်လည်း မိမိ တည်ထောင်က အောင်မြင်ချင်မှ အောင်မြင်နိုင်ပေသည်။ ထိုသို့ မတူကွဲပြား ဖြစ်ပေါ်ရာတွင် အခြေအနေ ကွာခြားချက် ရှိ၍ ဖြစ်သည်။ ထုတ်ကုန်ပစ္စည်း အရည်အသွေး၊ ထုတ်ကုန်ပစ္စည်း ဈေးနှုန်း၊ အလုပ်ချိန် အတွင်း ကုန်ပစ္စည်း ထုတ်လုပ်မှုနှုန်း စသည်ဖြင့် ခြားနားခြင်းကြောင့် ဖြစ်ကြောင်း ယေဘုယျ တွေ့ရှိနိုင်ပေသည်။ ထိုသို့ဆိုလျှင် မည်သို့ ဖြေရှင်းမည်နည်း။ ဤဆောင်းပါး ရေးရခြင်း အဓိက ဦးတည်ရည်ရွယ်ချက်မှာ ကုန်ပစ္စည်း ထုတ်လုပ်မှုနှုန်းကို စိစစ် လေ့လာရန် ဖြစ်သည်။ အလွယ်တကူ နားလည်နိုင်သော ဥပမာ တစ်ခုကို ဆွေးနွေးလိုပါသည်။ လူအများ နံနက်ခင်း Breakfast အစားအစာ တစ်ခုကို ရောင်းချသည် ဆိုပါစို့။ အလုပ်သမား တစ်ဦးသည် Breakfast အစားအစာကို ချက်ပြုတ်ရာတွင် ပမာဏ နည်းလျှင် အကျိုးအမြတ် တစ်မျိုး၊ ပမာဏများလျှင် အကျိုးအမြတ် တစ်မျိုး ဖြစ်မည်ကို အလွယ်တကူ သိရှိနိုင်ပေသည်။ ထိုသို့ဆိုလျှင် လုပ်အားခသည် ပုံသေ ဖြစ်ပြီး ထုတ်ကုန် ပမာဏကို များသည်ထက် များအောင် စီမံနိုင်လျှင်၊ ဈေးကွက်လည်း အထိုက်အလျောက် ကျယ်ပြန့်လျှင် အကျိုးအမြတ် တိုးတက်လာမည်။

သို့မဟုတ် ဆုံးရှုံးနေရာမှ အမြတ်အစွန်း ဖြစ်လာနိုင်သည်ဟု ရိုးရိုးရှင်းရှင်း တွေးနိုင်ပါသည်။ ဥပမာ စဉ်းစားပြရခြင်း ဖြစ်သည်။ အသေးစိတ် တွက်ပါက အဖြေရရှိမည် ဖြစ်သည်။ စဉ်းစား တွက်ချက်နိုင်သည့် နောက်တစ်နည်းမှာ အလုပ်သမား (၅) ဦး ရှိသည့် ထုတ်လုပ်မှု လုပ်ငန်း တစ်ခု ဆိုပါစို့။ အလုပ်သမားများကို လုပ်ငန်းခေါင်းစဉ် တစ်ခုချင်း ပုံသေ ခွဲဝေ လုပ်ဆောင်စေခြင်းနှင့် အလုပ်သမား အားလုံးသည် လုပ်ငန်း ခေါင်းစဉ်များကို ဝိုင်းဝန်း လုပ်ဆောင်ခြင်း ဟူ၍ နှစ်မျိုး ရှိသည် ဆိုပါစို့။ လုပ်ငန်းခေါင်းစဉ် တစ်မျိုးကို သတ်မှတ်ထားသော အချိန်အတွင်း အချိန်ပြည့် လုပ်ဆောင်ရသည် ရှိသလို အချိန်ပြည့် လုပ်ဆောင်ရန် မလိုဘဲ အချိန် အလဟဿ ဖြစ်နေသည်များလည်း ရှိနေနိုင်ပေသည်။ ဥပမာ ပြရာလျှင် စားသောက်ဆိုင် တစ်ဆိုင်တွင် အလုပ်သမားများသည် အလုပ်ချိန် အပြည့် လုပ်ငန်းခေါင်းစဉ် အမျိုးမျိုးကို ဆောင်ရွက်နေသည်ကို တွေ့ရပါက အလုပ်ချိန်သည် အလဟဿ မဖြစ်ဟု ယေဘုယျ နားလည်နိုင်သည်။ အသေးစား စက်ရုံ တစ်ခုတွင် လုပ်ငန်းခေါင်းစဉ် အလိုက် အလုပ် လုပ်နေရာတွင် အချိန်ပြည့် အလုပ် လုပ်နေရသည့် အလုပ်အမျိုးအစား ရှိသလို အချိန်ပိုင်းသာ အလုပ် လုပ်ရသည့် အလုပ် အမျိုးအစားလည်း ရှိနိုင်ပေသည်။ ထိုသို့ဆိုလျှင် လုပ်အား အလဟဿ ဖြစ်နေနိုင်သည့် အခြေအနေကို အလွယ်တကူ သိရှိနိုင်ပေသည်။

ယင်းအချက်ကို ဆန်းစစ် လေ့လာပြီး ရှင်းလင်း လွယ်ကူသော ကုန်ထုတ်လုပ်မှု အလုပ်ရုံ သို့မဟုတ် အသေးစား စက်ရုံများ အတွက် အလုပ်သမား အားလုံး အချိန်ပြည့် အလုပ် လုပ်နိုင်သည့် လုပ်ငန်းခေါင်းစဉ် ပုံသေ မသတ်မှတ်သော ကုန်ထုတ်လုပ်မှု စနစ်ကို အကောင်အထည်ဖော်လျှင် တစ်နာရီ သို့မဟုတ် တစ်နေ့တာ ကုန်ထုတ်လုပ်မှုနှုန်းသည် တိုးတက်လာနိုင်ပေသည်။ လုပ်အားခ သို့မဟုတ် ကုန်ထုတ်လုပ်မှု ကုန်ကျစရိတ် မတိုးလာဘဲ ကုန်ထုတ်လုပ်မှုနှုန်း မြင့်မားလာခြင်းဖြင့် အကျိုးအမြတ် ဖြစ်ထွန်းမှုကို ဖြစ်ပေါ်လာနိုင်ကြောင်း တွေ့ရှိနိုင်ပေသည်။ ယခု ရေးသားဖော်ပြခြင်း အခြေခံ သဘောတရားကို စားသောက်ဆိုင် အငယ်စားများ၊ အိမ်တွင်း ကုန်ထုတ်လုပ်မှု လုပ်ငန်းများ၊ အသေးစား သောက်ရေသန့် ထုတ်လုပ်မှု လုပ်ငန်းများ၊ အသေးစား အလှကုန် ထုတ်လုပ်မှု လုပ်ငန်းများတွင် အသုံးတည့်နိုင်ပါကြောင်း ဆွေးနွေး တင်ပြရပါသည်။ တစ်ပိုင်တစ်နိုင် စီးပွားရေး လုပ်ငန်းများ အောင်မြင် ဖြစ်ထွန်းနိုင်ကြပါစေ။

By Opportunity Journal
Originally posted 01/06/2011 10:57AM မြမြင့်မိုရ်(လှိုင်)
source : http://news.yatanarpon.com.mm/cp/oopportunityjournal/article-20644