ယနေ့ခေတ် စီမံခန့်ခွဲမှု၏ အရေးပါမှု နှင့် အနာဂတ် မြန်မာ နိုင်ငံ

ယနေ့ခေတ် စီမံခန့်ခွဲမှု၏ အရေးပါမှု နှင့် အနာဂတ် မြန်မာ နိုင်ငံ
ကမ္ဘာပေါ်တွင် စီးပွားရေးနယ်ပယ် ထဲကို ၀င်ရောက်မည့် လူငယ်ကျောင်းသားတိုင်းအဓိက ရည်မှန်းချက်ပန်းတိုင်ဖြစ်သော စီပွားရေးစီမံကွပ်ကဲမှုမဟာဘွဲ့ ( MBA )သည်ခေတ်စားလျှက်ရှိပေသည်။ တစ်ကမ္ဘာလုံးရှိ လူငယ်ကျောင်းသားများအနေဖြင့် အနာ ဂတ်စီးပွားရေးလောက ၏ ခေါင်းဆောင်ငယ်များကို မွေးထုတ်ပေးလျှက်ရှိသော နာမည်ကြီး တက္ကသိုလ် ကျောင်းများမှ ထို MBA ကိုရရှိရန် အသည်းအသန်ကြိုးစားလျှက်ကြပေသည်။ အမေရိကန်ရှိ ဟားဗက်တက္ကသိုလ်၊ ယေးတက္ကသိုလ်၊ မက်ဆာ ချုးဆက်ရှိ MIT၊ စတန်းဖို့ တက္ကသိုလ် တို့သည်ကျော်ကြားသကဲ့သို့ လူငယ်တိုင်း၏ အိပ်မက်ဖြစ်သော အင်္ဂလန်ရှိ အောက်စ်ဖို့ နှင့် လန်ဒန်စကူးအော့ဖ် ဘစ်စနက် တို့သည်လည်း လူကြိုက်များလှပေသည်။ငွေကုန်ကြေးကျ များပြားလှသော ၄င်းတက္ကသိုလ်နှင့်ကျောင်းအသီးသီးကိုတက်ရောက်ပညာသင်ယူနိုင်ရန်မူတစ်ကမ္ဘာလုံးရှိနိုင်ငံအသီးသီးမှ ကျောင်းသူကျောင်း သားများ အတွက် မဟာ အခက်အခဲကြီးပင်ဖြစ်လေတော့သည်။ မြန်မာ့ကျောင်းသူကျောင်းသားများအတွက်မူပြောပြရန်ပင် မလိုအောင် ခက်ခဲလှပေသည်။


အာရှတိုက်သည် စီးပွါးရေးဖွင့်ဖြိုးလာသည်နှင့်အမျှ လူငယ်ပညာတတ်များစွာလိုအပ်လျှက်ရှိပေသည်။ စင်္ကာပူ၊ အော်စီ၊ထိုင်း၊ မလေး၊အင်ဒို ၊အိန္ဒိယ၊ ဟောင်ကောင် စသည့် နိုင်ငံရှိကျောင်းများသည်လည်း ဥရောပ ကျောင်းများနှင့် တွဲဖက်၍ စီပွားရေးစီမံ ခန့်ခွဲမှု သင်တန်းများကို တိုးချဲ့ ဖွင့်လစ်သင်ကြားလျှက်ရှိပါသည်။ စင်္ကာပူရှိ SMU စင်္ကာပူ စီမံခန့်ခွဲမှု တက္ကသိုလ်သည် ထင်ရှား သကဲ့သို့ ထိုင်းရှိ ချူလာလောင်ကွန်းတက္ကသိုလ်လည်း ထင်ရှားသည်။


မြန်မာနိုင်ငံဖက်သို့ တစ်ဖန်ကြည့်ပါမည်။ မြန်မာနိုင်ငံသမ၀ါယမ ၀န်ကြီးဌာနအောက်ရှိ အမျိုးသားစီမံခန့်ခွဲမှုကောလိပ်မှ ဘီဘီအေ ဘွဲ့ရများ မွေးထုတ်ပေးလျှက်ရှိပါသည်။ စီးပွါးရေးတက္ကသိုလ်မှလည်း B.Act, B.Ecom, B.Com, MBA, MPA, DMA, , CPA စသည့် ပြည်တွင်းအသိအမှတ်ပြု ဘွဲ့သင်တန်းများ၊ဒစ်ပလိုမာ သင်တန်းများကို ဖွင့်လစ်သင်ကြား ပေးလျှက် ရှိပါသည်။ ထိုသင်တန်းများကို တက်ရောက်သင်ကြားရန် အခွင့်အလမ်းများမှာလည်း လူတိုင်းလက်လှမ်းမှီနိုင်လောက်အောင် မနီးစပ်လှပါချေ။ အဆင့်ဆင့်နီးစပ်ရာ နီးစပ်ကြောင်းရွေးချယ်ပြီး ငွေရေးကြေးရေးကုန်ကျ မှုများစွာဖြင့် တက်ရောက်သင်ကြား ရသည် ဆိုလျှင်လည်း လွန်မည်မထင်ပါ။


ကျောင်းပညာရေးတွင် န၀မတန်းမှ စ၍ စီးပွါးရေးဝေါဟာရများနှင့် ဝေးကွာခဲ့ရသော သိပ္ပံတွဲအထူးပြုကျောင်းသူ ကျောင်းသားများအဖို့ တက္ကသိုလ်ပညာရေးတွင် လည်း စီးပွါးရေးစီမံခန့်ခွဲမှု၊စာရင်းကိုင်ပညာ၊ဘဏ်လုပ်ငန်း၊ လော်ဂျက်စတစ် ( logistic ) စသည် ပညာရပ် များနှင့်လည်း စိမ်း၍လာပါသည်။ အပြင်သင်တန်းများဖြစ်ကြသော LCCI,MYOB,ABE, စသည့်သင်တန်းများကမရှိမဖြစ်ကဲသို့ တက်ရောက်သင်ကြားရမည့် သင်တန်းများအဖြစ်ပေါ်ပေါက်ထွန်းကားလာပါတော့သည်။ အလုပ်အကိုင်အခွင့်အလန်းရရှိရန် လည်းကောင်း၊ diploma လက်မှတ်၊ certificate လက်မှတ် ပေါင်းများစွာ နှင့် ယှဉ်တွဲ၍ မဟုတ်ပါက အလုပ်ကောင်းတစ်ခုရရန် မမျှော်လင့်နိုင်ချေ။


မြန်မာနိုင်ငံတွင် ဆေးပညာဒေါက်တာဘွဲ့မှလွဲလျှင် ရေကြောင်းသိပ္ပံနှင့် နည်းပညာတက္ကသိုလ်မှ ပေးသော ဘီအီး( BE ) ဘွဲ့သည် လူငယ်တို့အတွက် ရည်မှန်းချက်တစ်ခုဖြစ်ပါသည်။ ကွန်ပြူတာ တက္ကသိုလ်ကလည်း နာမည်သာခေါ်၍ကောင်းပါသည် အပြင်သင်တန်းများက သင်ကြားပေးသောပညာဖြင့်သာ ကျောင်းသားတို့ ကွန်ပြူတာကို ကောင်းစွာအသုံးချနိုင်ခြင်းဖြစ်သည်ကိုမူ မည်သူမျှ မငြင်းနိုင်ပါချေ။ ကွန်ြ့ပူတာ၊  အင်္ဂျင်နီယာပညာနှင့် စီးပွားရေးမှာ တစ်လမ်းဆီလိုဖြစ် နေပြန်သည့် အတွက် ဘီအီးဘွဲ့ ရများအဖို့ အခြားစီမံခန့်ခွဲမှု့ပညာ တစ်ခုခုကို မလေ့လာဘဲလျှက် စီးပွားရေးလုပ်ငန်းများ၏ ခေါင်းဆောင် ငယ်များထွက်ပေါ်လာနိုင်လိမ့်မည်မဟုတ်ချေ။



စီးပွားရေးတက္ကသိုလ် ရန်ကုန်မှ အွန်လိုင်း E-MBA အစီအစဉ်သည်လည်း ထင်သလောက်အောင်မြင်သည်ဟု မကြားသိရချေ။ ပြီးနောက်လုပ်ငန်းခွင်အချိန်လွတ် MBA သည်လည်း ကောင်းမွန်သော အစီအစဉ်ဖြစ်ပါလျှက် ယခု ထက် တွင်တွင်ကျယ်ကျယ် ထိထိရောက်ရောက် ကျောင်းဆင်းများမွေးထုတ်ပေးနိုင်လျှင်ပို၍ကောင်းပါသည်။


မြန်မာနိုင်ငံသည် စီးပွားရေးပွင့်လင်းလာတော့မည့် အရိပ်အယောင်များဖြစ်ပေါ်လျှက်ရှိပြီး ပြည်ပ ရင်းနှီးမြှုပ် နှံမှု များဝင်ရောက် လာပါက စီမံခန့်ခွဲမှု သည် မရှိမဖြစ်လိုအပ်လာပေလိမ့်မည်။ ထိုအတွက် လူငယ်မောင်မယ်များအနေဖြင့် တတ်နိုင်သည့်ဖက်မှ စီမံခန့်ခွဲမှု အကြောင်းများကို လေ့လာထားသင့်ပါသည်။ စီမံခန့်ခွဲမှု နှင့်ဆိုင်သော သင်တန်းများ။ စာရင်းအင်းကိုင် မှုနှင့်ပတ်သပ်သော ပညာရပ်များ၊ ဘဏ်လုပ်ငန်းနှင့်ဆိုင်သော ပညာရပ်များ ၊ သွင်းကုန်ထုတ်ကုန် နှင့် ဆိုင်သော ပညာရပ်များ။ ဈေးကွက်ချဲ့ ထွင်ရေး၊ ဈေးကွက်စီးပွါးရေး၊ အစုစပ်လုပ်ငန်းများ။ ကုမ္ပဏီ လုပ်ထုံးလုပ်နည်းဥပဒေများ။ စာချုပ် စာတမ်းဆိုင်ရာ သိထားသင့်သည်များ။ အလုပ်သမားဥပဒေနှင့် အခွင့်အရေး။ စသည့်ဗဟုသုတများစွာကို ကျယ်ကျယ်ပြန့် ပြန့် လေ့လာထားသင့်ပါသည်။


အမျိုးသမီးနှင့်အမျိုးသားတို့သည် ထိုနေရာတွင် တန်းတူအခွင့်အရေးရလျှက်ရှိရကား အမျိုးသမီးများကလည်း အမျိုးသားများ နောက်ကောက်ကျ မနေအောင် ပိုမို လေ့လာထားသင့်ပါသည်။ စီမံခန့်ခွဲမှု သီဝရီပိုင်း၊ တွင်သာကျောင်းများက သင်ကြားပေးနိုင်သော်လည်း လက်တွေ့ကျကျ စီမံခန့်ခွဲမှုကိုမူလုပ်သက် ရင့်သောသူများကသာ ပိုမိုကျွမ်းကျင်ပါသည်။ တစ်ချို့  စီမံခန့်ခွဲမှုလုပ်ငန်းစဉ်များသည် စာဖြင့်ရှင်းပြ၍မရလောက်အောင် ရှုပ်ထွေးများမြောင်လှသော လူမှုရေးနှင့် ယဉ်ကျေးမှု ၊ ရိုးရာ နေရာဒေသ ဓလေ့ စသည့်အချက်များစွာပါဝင်ပတ်သက်နေပြန်ပါသည်။


သင်တန်းများတက်ခြင်းသည် ငွေကုန်အချိ်န်ကုန်ပြီး လူပင်ပန်းလှရကား လူငယ်တို့သည် သင်တန်းဟူသည့်အသံကြားလျှင်ပင် စိတ်ညစ်ညူးတတ်ကြပါသည်။မိဘများကပို၍ပင်ဆိုးတော့သည်။ငွေရေးကြေးရေးတတ်နိုင်သောမိသားစုများဆိုလျှင်အကြောင်းမဟုတ်၊ချို့ တဲ့သောမိသားစုမှမွေးဖွားလာခဲ့ရလျှင်မူ မဖြစ်နိုင်သောအရာတစ်ခုကို အိပ်မက်မက်နေသကဲ့သို့ဖြစ်နေပါသည်။ လူငယ် တို့သည် ကြိုးစားချင်စိတ် ရှိသူ၊ တတ်ကြွသောသူများ၊ အနာဂတ်တွင် ရည်မှန်းချက်ကြီးမားသူများဖြစ်သောကြောင့် နည်းလမ်းအမျိုးမျိုးဖြင့်ပညာရပ်များကို မိမိဘာသာမိမိလေ့လာနိုင်ကြပါသည်။


အွန်လိုင်းတွင် အင်္ဂလိပ်ဘာသာဖြင့် စီမံခန့်ခွဲမှုများအကြောင်း အခမဲ့ပို့ချနေသော www.alison.com

, www.masterclass.com

,  www.about.com

, www.mit.com/sloanschoolofmanagement/

 စသည့် ဆိုဒ်များ တွင်လည်း လေ့လာနိုင်ပါသည်။ Alison ဆိုဒ်တွင် သူပြဌာန်းထားသော မော်ဒျူးပြီးဆုံးပါက စာမေးပွဲဖြေဆိုရမည်ဖြစ်ပြီး သင်တန်းအောင်လက်မှတ် diploma ကိုရယူနိုင်ပါသည်။ Masterclass တွင်မူ စီမံခန့်ခွဲမှု သင်ခန်းစာ ၁၀ ခန်းပါပြီး အသေးစိတ်ကိုလည်း အချိန်၃ လမျှ သင်ယူုရပြီး စာမေးပွဲ နှင့် case study တွေပါဖြေဆိုရပါသည်။ အောင်မြင်ပါက အွန်လိုင်းတွင် ဒေါ်လာ ၂၀ မျှသာသွင်းပြီး အောင်လက်မှတ်ရယူနိုင်ပါသည်။ ထို့အပြင် ဟားဗက်နှင့် အမ်အိုင်တီတို့ က လွင့်တင် ထားသော ၀က်ဆိုဒ်များတွင် ၄င်းတက္ကသိုလ်ထုတ် နာမည်ကြီး Harvard Business Review နှင့် MIT Sloan Management Review တို့ကို အခမဲ့ဖတ်နိုင်ပါသည်။

လူငယ်များစီမံခန့်ခွဲမှုကိုပိုမိုစိတ်ဝင်စား၊လေ့လာပြီး အောင်မြင်ထက်မြတ်တဲ့ အနာဂတ်ခေါင်းဆောင်များဖြစ်ပါစေ။Posted 13th October 2012 by tu shin