ဘရန်ဒီတစ်ပုလင်း (သော်တာဆွေ)

ဘရန်ဒီတစ်ပုလင်း (သော်တာဆွေ)
================
ဤခေတ် ဤအခါ၌ ဤကဲ့သို့သော ပျားအုံတံဆိပ်၊ သံကြိုးခတ်၊ ဘီဟိုက် ဘရန်ဒီစစ်စစ်ကို ရှာဖွေယူဆောင်လာနိုင်သူအား အထူးပင် ချီးမွမ်းဩဘာ ထောပနာပြုဖွယ် ကောင်းပါပေ၏။

အကြောင်းမှာ နိပွန်မာစတာတို့ စိုးစံတော်မူသော ဒုတိယမြောက်နှစ်ဖြစ်၍ ၎င်းမာစတာများကိုယ်တိုင်ပင် ဆာကေးခေါ် အဘိဓမာ ချက်အရက်လောက်မှ မစွံသော ဂျပန်စိမ်ရေကို သောက်သုံးနေရသော အချိန်ဖြစ်၍ အနောက်နိုင်ငံဖြစ် လက်ကျန် ဘီယာ၊ ဘရန်ဒီ၊ ဝီစကီတို့ကား ကြက်ပျောက်၊ ငှက်ပျောက် ပျောက်ကုန်လေပြီ။ လူမမာ ဓာတ်စာအတွက် သတင်းစာကြော်ငြာနှင့် လိုက်လံရှာဖွေသော သူများပင် လက်လျှော့ရသော အခါသမယကြီး ဖြစ်ပေ၏။

အကယ်၍သာ စမ်းချောင်းကွက်သစ်ရှိ မင်းတိုင်ပင်အမတ်ဟောင်း ဦးတုတ်ပေါ၏ နှုတ်ခမ်းမွေးကို ထူးဆန်းစွာ မီးမလောင်ခဲ့ပါမူ ထိုဘရန်ဒီတစ်ပုလင်းသည် ဤရပ်ကွက်သို့ ရောက်လာမည် မဟုတ်ချေ။

ဦးတုတ်ပေါ လူ့ပြည်သို့ ရောက်ခဲ့သည်မှာ နှစ်ပေါင်းခြောက်ဆယ်ကျော်နင်း ခုနစ်ဆယ်သို့ ချဉ်းခဲ့ချေပြီ။ ယခုကဲ့သို့ ဝမ်းနည်းပက်လက် မဖြစ်စဖူး ထူးထူးဆန်းဆန်း အသက်အရွယ်ကြီးမှပင် ကြုံတွေ့ရချေသည်။

လူပျိုဘဝ၌ ရည်းစားပေါင်း တစ်ဒါဇင်ကျော်မျှ သူ့အရင် လင်ယူသွားကြသည်ကို ဤမျှ မဆွေးပူမိ။ ထုံပလုံတုံ တေခဲ့သည်။ ချစ်လှစွာသော သမီးအကြီးဆုံး လင်ပေးစားခါနီး သူ့ရည်းစားနောက် လိုက်ပြေးခဲ့စဉ်ကနှင့်လည်း မနှိုင်းယှဉ်နိုင်။ ရှိသမျှပစ္စည်းကလေး ကုန်အောင်ပင် ကြိုးပမ်းခဲ့၍ အမတ်ရာထူးရပြီးနောက် အမတ်တို့၏ဘာဝ အပျော်အပါးလွန်သဖြင့် အရင်းငွေတစ်ပြားမျှ မစုမိခင် ရာထူးပြုတ်ကျသည်ကို ဤမျှ ဝမ်းမနည်းမိ။ အမတ်လုပ်ပြီး ရမ်းကားမှုကြောင့် မယားဖြစ်သူ စိတ်ညစ်သေသည်လည်း မထောင်းတာလှ။

ယခုတစ်မူ အခြားအခြားသော သေရာမပါနိုင်သည့် ပစ္စည်းတွေ၊ ဂုဏ်တွေ၊ ပျက်စီးနိမ့်လျှောခဲ့သည်ထက်၊ ဤ ရှင်အတူ သေမကွဲ ပါမည်ထင်ခဲ့သော မိမိ၏ ခံ့ခံ့ထည်ထည် နှုတ်ခမ်းမွေးကြီးကိုမှ ထူးဆန်းစွာ မီးလောင်ဆုံးရှုံး ပျက်စီးရသောကြောင့် အလွန့်အလွန် နှမြောတသ ပူဆွေးဝမ်းနည်းခြင်းကို ဖြစ်ရလေတော့၏။

သူ အမတ်ဖြစ်စဉ်ကမူ သူ၏ ပုံမှာ တွဲလဲဆွဲထားသော ထန်းလက်ခြောက်ကြီးသဖွယ် နှုတ်ခမ်းမွေးကြီးကားနေရန် အရေးကြီးလှပေ၏။

သူ၏ နှုတ်ခမ်းမွေးမျိုးမှာ လူတစ်သိန်းလျှင် တစ်ယောက် မရှိ။ သူ၏ ပါရမီထူး၍သာ သူ့၌ တန်ဆာဆင်နေသည်ဟု ယူဆနေခဲ့၏။ “နှုတ်ခမ်းမွေးကြီးနှင့် ဦးတုတ်ပေါ။ ဦးတုတ်ပေါကြီးနှင့် နှုတ်ခမ်းမွေး”ဟု ဝေးနီးရပ်ခြား ကျော်ကြားကာ သူ၏မိတ်ဆွေ၊ ဆွေမျိုးများကပင် သူ့နှုတ်ခမ်းမွေးကြီးအတွက် ဂုဏ်ယူသည်ဟု ထင်မြင်ခဲ့၏။

ယခုမူ ထိုနှုတ်ခမ်းမွေးကြီး ဆုံးရှုံးရချေပြီ။
ဦးတုတ်ပေါသည် အသက်ကြီးမှ ဘာမှ မလုပ်တော့ဘဲ အမတ်ရာထူးဒဏ်ကြောင့် ရှိသမျှ ပစ္စည်းကလေး ကုန်ခဲ့၍ လက်ကျန်အိမ်တစ်လုံးပေါ်တွင် အိမ်ထောင်သည် သမီးတစ်ယောက်နဲ့ အတူနေကာ သမက်၏ လုပ်စာကို စားနေ၏။ သူ၏ အကျင့်မှာ နံနက်စောစောတွင် အမတ်လုပ်စဉ်က စတိုင်အတိုင်း၊ ဘောင်းဘီတိုတို၊ ဗိုက်ရွှဲရွှဲ၊ နှုတ်ခမ်းမွေးကားကား၊ တုတ်ကောက်တစ်ဖက်နှင့် လမ်းလျှောက်လေ့ရှိ၏။ ထမင်းစားခါနီးတွင် အရက်ကလေး မှန်မှန်သောက်၍ ထမင်းကို မြိန်ယှက်စွာ စားနိုင်သဖြင့် အသက်ကြီးသော်လည်း ကျန်းမာဝဖြိုးတုန်းပင် ဖြစ်၏။

အထူးသဖြင့် သူ အနှစ်သက်ဆုံးမှာ ဆေးပြင်းလိပ် ဖြစ်၏။ ဘယ်တော့မှ အပြတ်မခံနိုင်။ ဆေးပြင်းလိပ်နှင့် ဓာတ်မီးခြစ်တစ်ခုမှာ လက်၌ အမြဲတစေ ရှိနေရ၏။ ဆေးလိပ်ကိုလည်း မည်မျှပင်တိုတို ပါးစပ်တပ်ရလျှင် တစ်ဖွာရရ နှစ်ဖွာရရ ညှိသောက်လေ့ရှိ၏။ အိပ်ခါနီးတွင် ခေါင်းအုံးနား၌ ချထားကာ နိုးလျှင်နိုးချင်း၊ ဘာမှမပြော၊ ဘာမှမလုပ်၊ မျက်နှာမသစ်၊ ပလုပ်မကျင်းသေးဘဲ ဆေးလိပ်တိုတို ပါးစပ်တွင် အလျင်အမြန်တပ်ပြီး မီးညှိလေ့ ရှိ၏။

တစ်နေ့သောအခါ၌ ဦးတုတ်ပေါသည် နံနက်စာကို မြိန်ယှက်စွာ စားပြီး အိမ်ရှေ့ခန်းတွင် တုံးလုံးလှဲကာ ဆေးပြင်းလိပ်သောက်ရင်း ထမင်းလုံး စီလေ၏။ အိပ်ပျော်ခါနီးတွင် ဆေးလိပ်တိုကလေးကို ခေါင်းအုံးအနီး ဓာတ်မီးခြစ်ကလေးနှင့်အတူ ချထားလိုက်၏။ ဆေးလိပ်တိုကလေးမှာ လက်ဆစ်တစ်ဆစ်မျှသာ ကျန်တော့၏။

မည်မျှကြာအောင် အိပ်ပျော်သွားသည် မသိ။ ရုတ်တရက် အိပ်ရာမှ နိုးပြီး နှုတ်ခမ်းမွေးတွင် စိမ့်ခနဲ အေးတေးတေးရှိသည်ဟု ထင်မိ၏။ သို့သော် ထုံးစံအတိုင်း ဘာကိုမှ မလုပ်၊ ဘာကိုမှ မစဉ်းစားသေးဘဲ ဆေးလိပ်တိုကို ပါးစပ်တပ်ကာ ဓာတ်မီးခြစ်ကို ကပ်၍ ခြစ်လိုက်လေ၏။

မီးသည် ရုတ်တရက် ဟုန်းခနဲ ထတောက်ကာ နှုတ်ခမ်းမွေးတို့ကို တဖျစ်ဖျစ်နှင့် လောင်လေ၏။
“ဟဲ့… ဘာဖြစ်တာလဲဟဲ့၊ ဘယ့်နှယ်ပါ့လိမ့်”
ဟု ရုတ်တရက်မူ ဘာမှ မလုပ်နိုင်ဘဲ ခြေမကိုင်မိ၊ လက်မကိုင်မိ၊ တစ်ယောက်တည်း အော်နေမိ၏။ နောက်မှ သတိရလာကာ ပုဆိုး ခါးပုံစနှင့် မ၍ ပွတ်လိုက်မှ မီးငြိမ်းသွားတော့၏။ သို့သော် သူ၏ နှုတ်ခမ်းမွေးရှည်ကြီးများ မရှိတော့ချေ။ မီးမြှိုက်ခါစ ဝက်မွေးကဲ့သို့ ကျိုးတိုးကျဲတဲ တွန့်တွန့်ကလေးများသာ ကျန်တော့၏။

မျက်နှာကြီးရဲရဲနှင့် အနီးရှိတိုင်တွင် ချိတ်ထားသော မှန်ကို သွား၍ ကြည့်လေ၏။
“ဟိုက်… သောက်ကျိုးနည်းရော”
ဟု တစ်ခွန်းတည်းအော်ကာ အသက်ပါသွားသကဲ့သို့ ပါးစပ်ကြီးအဟောင်းသားနှင့် ကြက်သေ သေနေလေ၏။ တစ်မိနစ်ခန့်ကြာမှ သတိရလာကာ သက်ပြင်းကြီးချလျက် ဓာတ်မီးခြစ်ကို ပြန်၍ ကိုင်ကြည့်လိုက်ရာ မီးစာမှာ ငါးစင်တီမီတာမျှ ရှည်ထွက်နေသည်ကို တွေ့ရသဖြင့် ပတ်ဝန်းကျင်ကိုကြည့်ပြီး တောက်တစ်ချက် ပြင်းစွာ ခေါက်လိုက်လေ၏။

ဘယ်သူ့ကိုမှ မမြင်ရသဖြင့်…
“ဝင်းကြည်”
ဟု မီးဖိုထဲတွင် အမြဲ ရှိရမည်ဖြစ်သော အစေခံမလေးကို ကျယ်လောင်စွာ ခေါ်လိုက်လေ၏။ သူ့ခေါ်သံနှင့် တစ်ဆက်တည်း…
“ရှင်”
ဟု ထူးကာ ဆံပင်ကို ပြင်ပတ်ရင်း အပျိုပေါက်မလေးတစ်ယောက် ထွက်လာလေ၏။ သူ၏ နှုတ်ခမ်းမွေးကိုကြည့်၍ ရယ်ချင်၏။ သို့သော် မရယ်ဝံ့ချေ။
“ဓာတ်မီးကို ဘယ်သူ ကိုင်တာမြင်လဲ”
“ဘိုးဘိုး အိပ်နေတုန်းက အောင်လေး ကိုင်တာ မြင်တယ်”
ဟု မဆုတ်မဆိုင်း ဖြေလိုက်လေ၏။ အကြောင်းမူကား ဝင်းကြည်သည် အိမ်၌ ဖြစ်သမျှကို မသိဟူ၍ မဖြေရ။ ဖြေခဲ့လျှင် အကြီးအကျယ် ဆူပူခြင်း ခံရလေ့ရှိသဖြင့် ဟုတ်ဟုတ် မဟုတ်ဟုတ် ပြန်ပြောရန် အကျင့်ရနေပြီး ဖြစ်၏။ အောင်လေးဆိုသူမှာ လေးနှစ်အရွယ်မျှ ကလေးဖြစ်၍ မဟုတ်ဘူးဟု အမှန်အတိုင်း ငြင်းဆိုခဲ့လျှင် အပျိုပေါက် ဝင်းကြည်က ဟုတ်ကြောင်း ယုတ္တိယုတ္တာနှင့် နိုင်အောင်ပြောမည် ဖြစ်ပေ၏။

တစ်အိမ်လုံးတွင် အောင်လေးမှာ အငယ်ဆုံးဖြစ်၍ ဝင်းကြည်မှာ အောင်လေးကို ကောင်းမွန်စွာ စကားရည်လုနိုင်သဖြင့် သူ့ခမျာမှာ မဟုတ်ဘဲနှင့် ခံရပေါင်း မရေမတွက်နိုင်တော့ပြီ။ ယခုမူကား ကြီးလေးသော အပြစ်ကို ခံရချေတော့မည်။

ဦးတုတ်ပေါသည် ဝင်းကြည်၏ အဖြေကို ကြားလျှင်ကြားချင်း -
“အောင်လေးရေ… ဟေ့… အောင်လေး”
ဟု ကုန်း၍ ခေါ်လေ၏။
အောင်လေးသည် အဘိုးခေါ်သံကြား၍ မုန့်ကျွေးမည်ထင်ကာ အပြေးကလေး လာခဲ့လေ၏။ လှေကားထစ်ဆုံးအောင် မတက်ရမီ ဦးတုတ်ပေါသည် ချိုင်းကမြှောက်ယူပြီး ‘ဓာတ်မီးခြစ် ဆော့ရမလား’ဆိုကာ အပြင်းအထန် ရိုက်လေ၏။

အောင်လေးသည် နာလွန်းလှ၍ ပွက်လောရိုက်အောင် ငိုလေ၏။ သုံးအိမ်ကျော်လောက်၌ သွား၍ မိန်းမချင်း စု၍ အတင်းပြောနေသော အောင်လေး၏မိခင် မမြခင် ကြားသဖြင့် အဖော်တစ်စုနှင့် အပြေးကလေး လာကြလေ၏။

“အမယ်လေး… အဖေ၊ ဘယ့်နှယ်လုပ်တာလဲ။ ကျုပ်ကလေးကို မရိုက်စဖူး ရက်စက်လှချေလား”
ဟု ဆိုကာ အတင်းဆွဲယူထားမှ လက်လွှတ်လိုက်တော့၏။ ဦးတုတ်ပေါသည် အောင်လေး မီးခြစ်ယူဆော့ပြီး မီးစာဆွဲမြှင့်ထား၍ မိမိနှုတ်ခမ်းမွေးကြီး လောင်ကုန်ကြောင်း ပြောဆိုပြသရာ မိန်းမတစ်စုမှာ ငိုအားထက် ရယ်အားသန်ကြလေ၏။

သို့သော် ကြာကြာမရယ်ဝံ့။ စိတ်နှလုံးထိခိုက်လှသော ဦးတုတ်ပေါ၏ မျက်နှာထားကြောင့် မျက်နှာပိုးသတ်ကာ နေလိုက်ရကုန်၏။

ဦးတုတ်ပေါသည် မိမိ မြတ်နိုးလှစွာသော နှုတ်ခမ်းမွေး ဆုံးရှုံးရခြင်းနှင့် ဒေါသအလျောက် မရိုက်စဖူး မြေးလေးကို ရိုက်မိခြင်းတို့ကြောင့် လှိုက်လှိုက်လှဲလှဲ ဝမ်းနည်းပက်လက် မျက်ရည်များကျလာ၍ အရေရှုံ့တွနေသော လက်မောင်းကြီးနှင့် သက်ငယ်ပြစ်နှင့်တူသော မျက်ခုံးမွေးကြီးများအောက်ဝယ် စီးထန်းထန်း မျက်ရည်တို့ကို သုတ်ကာ အိပ်ခန်းသို့ ဝင်သွားလေ၏။

***
ထိုနေ့မှစ၍ ဦးတုတ်ပေါသည် သူ၏ နှုတ်ခမ်းမွေးကြီးအတွက် မစားနိုင်၊ မသောက်နိုင်ဖြစ်ကာ ဘေးနီးချုပ်စပ်ရှိ မိတ်ဆွေ၊ ဆွေမျိုးများထံ စာအားဖြင့် လည်းကောင်း၊ လူကြုံဖြင့်လည်းကောင်း မိမိ နှုတ်ခမ်းမွေး ဆုံးရှုံးကြောင်းကို အကြောင်းကြားလိုက်၏။

ထိုမိတ်ဆွေ၊ ဆွေမျိုးတို့လည်း မနေသာတော့ဘဲ ထူးထွေတည့်အံ့ရာသော်ကို လာရောက် မေးမြန်းကြကုန်၏။ ထိုသူတို့သည် သူ၏ နှုတ်ခမ်းမွေးအတွက် အိပ်ရာထဲမှနေ၍ ရေးကြီးခွင်ကျယ် ပြောနေပုံနှင့် သူ၏ မီးလောင်ပြီးသော နှုတ်ခမ်းမွေးကိုကြည့်ကာ သူမမြင်အောင် ရယ်ကြလေ၏။ သူ၏ မျက်မှောက်တွင်မူကား မရယ်ဝံ့။ မသာအိမ်လာရသော သူများသဖွယ် ဝမ်းနည်းဟန်ဆောင်ကာ ‘အောင်လေး အမိုက်ကလေး’ မကောင်းကြောင်းကိုသာ ဝင်းကြည် ပြေးစကားအရ ယိုးမယ်ဖွဲ့နေကြရ၏။

ထိုနှုတ်ခမ်းမွေး မီးလောင်မှုကြီးကား ဤကဲ့သို့လျှင် ဝင်းကြည်ပြောစကားအရ အောင်လေးကိုသာ အပြစ်တင်နေကြခြင်းဖြင့် ပြီးစီးသွားလိမ့်မည်ဟု အောက်မေ့ခဲ့ကြရာ ပဲခူးမြို့မှ ပင်စင်ရ စုံထောက်ရာဇဝတ်ဝန်ဟောင်း ဦးတုတ်ပေါ၏ မိတ်ဆွေ ဦးဇော်ဝင်း ရောက်မှပင် တစ်မျိုးတစ်ဖုံ ပြောင်းလဲသွားပြန်လေ၏။

စုံထောက် ဦးဇော်ဝင်း၏ ယူဆချက်မှာ ဤမျှ နှုတ်ခမ်းမွေးကြီးကို ချွတ်ချွတ်ချုံးအောင် လောင်ခြင်းသည် မီးစာရှည်နေရုံနှင့် မလောင်နိုင်။ တစ်စုံတစ်ယောက်သောသူသည် တစ်နည်းတစ်ဖုံအားဖြင့် တမင်သက်သက် စီမံထားဟန်တူကြောင်း၊ မိမိ အတိအလင်းပြောရလျှင် အောင်လေး မဟုတ်။ အောင်လေးထက် အသက်များစွာကြီးသူ (ကျားမ မခွဲ) တစ်ယောက် (သို့မဟုတ် တစ်ယောက်ထက် ပို၍)သည် ဦးတုတ်ပေါ အိပ်နေစဉ် ပထမ မီးစာကို ဆွဲထုတ်ပြီး ဓာတ်ဆီဆွတ်ထားသည်။ ဒုတိယ နှုတ်ခမ်းမွေးကို (သို့မဟုတ် ဆေးလိပ်တိုပါ) ဓာတ်ဆီလောင်းလိုက်သည်။ နောက် ရုတ်တရက် ရှောင်သွားသည်။ ထို့ကြောင့်သာ ထိုနှုတ်ခမ်းမွေးကြီးကို ပြုတ်ပြုတ်ပြုန်းအောင် လောင်ကျွမ်းသည်ဟု ပြောဆိုလေ၏။

ထိုစကားကို ကြားလျှင် ဦးတုတ်ပေါသည် ရုတ်တရက် အိပ်ရာထဲမှ ထထိုင်ကာ…
“အမယ်လေး… စုံထောက်ဉာဏ်များ တယ်စူးရှပါလား၊ ဒါဟုတ်ရမယ်၊ ဒါကြောင့် အိပ်ရာကနိုးတော့ ကျုပ်နှုတ်ခမ်း အေးစိမ့်စိမ့် ဖြစ်နေတာပဲ၊ ဟုတ်ပြီ… ဟုတ်ပြီ… ဦးဇော်ဝင်း၊ စုံထောက်စမ်းပါ၊ ဒီတရားခံပေါ်ရင် ကင်ပေတိုင်မှာ အလုပ်လုပ်နေတဲ့ ကျုပ်သားကိုပြောပြီး ကြီးလေးတဲ့အပြစ်ကို ပေးခိုင်းမယ်”
ဟု ကြိမ်းဝါး ပြောဆိုလိုက်လေ၏။

မီးလောင်းစဉ်မှာ အိမ်မှာရှိနေသူကို စုံစမ်းရာ (၁) အစေခံမလေး ဝင်းကြည် အသက် (၁၅)နှစ် (၆)လ၊ မောင်ဖြတ်စ (၂၁)နှစ်နှင့် (၃)လ၊ ဦးတုတ်ပေါ၏ သမက် ကိုဘနိုင်၏ တူ ရောဂါဟောင်းပြန်ထ၍ အိပ်ရာထဲ၌ နေရသူ။

ဤနှစ်ယောက်အနက် ဒုတိယလူမှာ ထင်မြင်ယူဆဖွယ် ရှိနေ၍ စုံစမ်းကြည့်ရာ အောက်ပါအတိုင်း သိရ၏။

‘ဖြတ်စ’ဆိုသည်မှာ အင်္ဂလိပ်ဘာသာမှ ဆင်းသက်လာသော အမည်ဖြစ်၏။ သူငယ်စဉ်က သူ့အမေ့လင်နှင့် တူလွန်း၍ အင်္ဂလိပ်လို Same Chip ဆိမ်းချစ်ဟုခေါ်ရာမှ မြန်မာလို ပြန်လိုက်သောအခါ ‘ဖြတ်စ’ ဖြစ်လာ၏။

ထက်မြက်သော ယောက်ျားတစ်ယောက်၌ (၁) အရက်သောက်ခြင်း၊ (၂) လောင်းကစားခြင်း၊ (၃) မိန်းမလိုက်စားခြင်း တည်းဟူသော ဝါသနာသုံးခုအနက် တစ်ခုခုကို ဝါသနာပါရမည်ဟု စာဆိုရှိရာ မောင်ဖြတ်စမှာ ထိုသုံးခုလုံးကို ဒင်ပြည့်၊ ကျပ်ပြည့် ဝါသနာပါသူ ဖြစ်သောကြောင့် သူ့အိမ်မှ သူ့ဒဏ် မခံနိုင်တော့ဘဲ နှင်ထုတ်ထား၍ ဝါသနာချင်းတူသူ သူ့ဦးလေး ဦးဘနိုင်က ခေါ်ယူထားခြင်း ဖြစ်၏။

ဦးတုတ်ပေါနှင့် ရန်စဆို၍ကား နောက်တစ်လလောက်က ဦးတုတ်ပေါ၏ မြေး မော်လီခေါ် အပျိုမလေး လာစဉ်က မောင်ဖြတ်စက အတင်းလူပျိုစကားပြောပြီး ဖက်နမ်းမိ၍ ဦးတုတ်ပေါက နာနာကြည်းကြည်း ပြောဆိုဖူး၏။

သို့သော် ဦးဇော်ဝင်းက သူ့ကို တီးခေါက်ကြည့်သောအခါမူ ယဉ်ကျေးစွာပင် “ဦးမင်း ထင်မြင်ယူဆချက်မှာ များစွာ လျော်ကန်သင့်မြတ်လှပါကြောင်း၊ သို့သော် အခြားလူ တစ်စုံတစ်ယောက်၏ ပယောဂ မပါဘဲ သူကိုယ်တိုင်ပင်လျှင် သူ့ဟာသူ သုတ်သင်ချင်၍ ဉာဏ်ဆင်ပြုမူသည်လည်း ဖြစ်နိုင်ပါကြောင်း၊ အကြောင်းမှာ အချို့သော လူကြီးများသည် မိန်းမငယ်ကလေးများကို ယူချင်လာ၍ ကြီးရာမှ ငယ်ရွယ်နုပျိုလာအောင် ဆံပင်ကို ဆေးဆိုးခြင်း၊ နှုတ်ခမ်းမွေးကို ရိတ်ပစ်ခြင်းများကို တွေ့ကြုံဖူးပါကြောင်း။

ယခု ကျွန်ုပ်တို့၏ ကျေးဇူးရှင် ဘိုးဘိုးပေါမှာလည်း ပုထုဇဉ်ဖြစ်၍ မဖောက်ပြန်ဟု မပြောနိုင်ပါကြောင်း၊ သူ၏ နှုတ်ခမ်းမွေးမှာ အစဉ်သဖြင့် ဆွေဂုဏ်မျိုးဂုဏ်ကို အသားယူလာသည်ဖြစ်၍ အလိုအလျောက် ရိတ်ပစ်ရန် ခဲယဉ်း၍ ဉာဏ်ဆင်ပြုသည်လည်း ဖြစ်နိုင်ပါကြောင်း၊ မိမိမှာမူ အကုသိုလ်ဝင်လာကာ ရောဂါဟောင်း ပြန်ထနေသူဖြစ်၍ ဤကဲ့သို့ မကောင်းမှုကြီးကို မပြုဝံ့ပါကြောင်း…”
စသည်ဖြင့် ချေငံစွာ ပြောပြလေ၏။

ဦးဇော်ဝင်း ကိုယ်တိုင်ပင် မောင်ဖြတ်စပြောသကဲ့သို့ နှုတ်ခမ်းမွေးရိတ်ပြီး မိန်းမငယ်လေး ယူဖူးသူဖြစ်၍ ဤအမှုကို ဆက်လက်စုံစမ်းရန် ရွံ့တွံ့တွံ့ဖြစ်နေစဉ် ပဲခူးမှ မိမိမယား အထွေးဆုံးကလေး လင်ငယ်နောက် လိုက်သွားပြီဟု သံကြိုးရောက်လာသဖြင့် အလျင်အမြန် ပြန်သွားရလေ၏။

ပြန်ခါနီးတွင် မိတ်ဆွေဦးတုတ်ပေါမှာ နှုတ်ခမ်းမွေးအတွက် မအိပ်နိုင်၊ မစားနိုင် အိပ်ရာထဲလဲပြီး ပိန်းချုံးနေသည်ကို သနား၍ နှုတ်ခမ်းမွေးကို အလျင်အမြန် နဂိုအတိုင်း ပြန်ဖြစ်ရန် ဂျာမနီပြည်မှလာသော ဆေးရှိကြောင်း၊ ထိုဆေးမှာ သုံးခါမျှ သုတ်လိမ်းလိုက်လျှင် ဘိုးဘိုးအောင် ဆင်းလာပြီး တောင်ဝှေးနှင့် ထိုးပေးလိုက်သကဲ့သို့ အံ့ဩဖွယ်ရာ ရုတ်တရက် ချက်ချင်း နဂိုအတိုင်း ပြန်ဖြစ်လာမည်ဖြစ်ကြောင်း၊ ယခု ဂျပန်ခေတ်ကပင်လျှင် လက်ကျန်များ ရှာ၍ ရနိုင်ကြောင်း၊ ပုလင်းပုံသဏ္ဌာန်မှာ ပုတု ရှည်တေ ပြားတား လုံးတုံး ဖြစ်၍ တံဆိပ်မှာ ကမ္ဘာပေါ်တွင် မဖြစ်ပေါ်သေးသော ‘ကတ္တူးကတ္တံ’ခေါ် ခြေ (၃)ချောင်းရှိ အကောင်ရုပ် ဖြစ်၏။ ပုလင်းပတ်စက္ကူပေါ်တွင်မူ မည်သည့်လူမျိုးမျှ မဖတ်နိုင်သော စာကို ရေးထားကြောင်း စသည်ဖြင့် ဦးတုတ်ပေါ အိပ်ရာမှထအောင် ဉာဏ်ဆင်ပြီး မှာထားခဲ့လေ၏။

ဦးတုတ်ပေါမှာ ထိုစကားကို ကြားသည့်နေ့မှ စ၍…
“ကျုပ် တိုးကြောင်ကလေးမှာကျန်တဲ့ လယ်တစ်ခိုင် ကုန်ချင် ကုန်ပါစေဗျာ၊ ဒီဆေးကို မရ ရအောင် ရှာမယ်”
ဟု ဆိုကာ အိမ်တွင် မနားတော့ဘဲ ရန်ကုန်နယ်တစ်ဝိုက် ဈေးရှိသမျှကို မြေလှန်စနစ်ဖြင့် ရှာလေ၏။ ထိုစဉ်အတွင်း၌လည်း ဝမ်းဆွဲသည် ဒေါ်ဖွားတုတ်ကြီး ညွှန်ကြားချက်အရ နှုတ်ခမ်းမွေးနေရာကို ကြက်သွန်မပြတ် တိုက်ထား၍ သူ့အနားကပ်လိုက်လျှင် ကြက်သွန်နံ့ တထောင်းထောင်း ထနေလေ၏။

***
ဤကဲ့သို့ မနေမနား ရှာဖွေခဲ့ရာ ရက်ပေါင်းအတော်ကြာသောအခါတွင် သူ၏ မရှိသော ဆေးကိုကား မတွေ့။ ရေကူး ကံဘဲ့ ဟိန္ဒူဘုရားကျောင်း၏ နောက်ဖေး ကုလားနွားတင်းကုပ် နှစ်ခုကြားရှိ ညနေဈေးကလေးတွင် အထက်ဖော်ပြပါ ပျားအုံတံဆိပ် ဘီဟိုက်ဘရန်ဒီ တစ်ပုလင်းကို တွေ့လေ၏။

အမတ်ဖြစ်စဉ်က အရက်အကြောင်းကို ကောင်းကောင်းနားလည်ခဲ့သော ဦးတုတ်ပေါသည် မဆိုင်းမတွ ဈေးမဆစ်ဘဲ တရုတ်တစ်ယောက်နှင့် လု၍ ဝယ်လိုက်လေ၏။

ဤမျှ ရှားပါးခက်ခဲသော အရက်ပုလင်းကို ကြံကြံဖန်ဖန် ရရှိ၍ မိမိ၏ နှုတ်ခမ်းမွေးပေါက်ဆေးကို ရသလောက်နီးပါးမျှ ဝမ်းသာကာ ပယင်းရောင် အဆင်းကလေးကို ကြည့်ရှုလျက် ဟိုယခင် အမတ်ဘဝတွင် ဤဘရန်ဒီမျိုးနှင့် မြူးထူးစဉ်က ဟိုတယ်မလေးကလေးများ၏ ကနွဲ့ကလျ အမူအရာကလေးများကို တွေးတောနေစဉ် ရုတ်တရက် မမျှော်လင့်သော မိမိသမီး မမြခင်၏ ခုနှစ်လဗိုက်သည် မျက်စိထဲ၌ ကွင်းခနဲပေါ်လာသဖြင့် ရင်ထဲတွင် ဒိတ်ခနဲဖြစ်ကာ…

“ဟိုက်… မဖြစ်ဘူး မဖြစ်ဘူး။ သောက်လို့မဖြစ်ဘူး။ သူ မီးဖွားဖို့က အရေးကြီးတယ်။ ခါတိုင်း ကလေးတုန်းက ဒါနဲ့ချည်း ဖွားနေတာ။ သူ့ပေးမှပဲ။ အင်း… သူ့ပေးလိုက်ရင်တော့ ဘယ်လောက်များ ဝမ်းသာမလဲ”
ဟု တွေးတောကာ ရုတ်တရက် အမြန် အိမ်သို့ ပြန်ခဲ့လေ၏။

အိမ်သို့ ရောက်လျှင်ရောက်ချင်း မိမိ ရှားရှားပါးပါး ရလာခဲ့သော ပစ္စည်းကို လက်ထဲမှ မချမီ ဝမ်းသာအားရ ပြောဆို ကြွားဝါလိုက်ချင်လှသည်။ သို့သော် အိမ်၌ မမြခင် မရှိ။ အစေခံဝင်းကြည်နှင့် အသည်းအသန် ရောဂါထနေသော မောင်ဖြတ်စသာ ရှိသည်။ ထိုနှစ်ယောက်အနက် ဝင်းကြည်က ဘာမှ နားမလည်၍ အကျိုးရှိမည် မဟုတ်။ နားလည်သောသူကို ပြမှသာ အသားပါမည်ဟု အကြံရကာ လူနာ၏ အခန်းပေါက်ဝသို့ သွား၍-

“ဟေ့ … ဖြတ်စ”
ဟု ခေါ်လိုက်လေ၏။
မောင်ဖြတ်စသည် တစောင်းအိပ်နေရာမှ…
“ခင်ဗျာ”
ဟု မသက်သာသောအသံဖြင့် ထူးကာ သူ၏ ကိုက်ခဲလှသော ခါးတစ်ဖက်ကို လက်တစ်ဖက်ဖြင့် ဖိနှိပ်ရင်း သမင်လည်ပြန်လှည့်၍ ကြည့်လေ၏။ ပုလင်းကို ကိုင်မြှောက်ပြရင်း…
“ဟေ့.. ဒီမှာ ကြည့်စမ်းကွ”
“ဘာလဲဗျ။ ကတ္တူးကတ္တံတံဆိပ် နှုတ်ခမ်းမွေးဆေး ရခဲ့ပြီလားဗျ”
“မဟုတ်ပါဘူးကွ၊ ဘရန်ဒီလေ၊ ပျားအုံတံဆိပ် ဘီဟိုက်ဘရန်ဒီအစစ်ပေါ့ကွ”

ဘီဟိုက်ဘရန်ဒီအစစ်ဟု ကြားလိုက်လျှင်ပင် မောင်ဖြတ်စသည် အံ့ဩလန့်ဖျပ်သော အမူအရာနှင့် အိပ်ရာမှ လူးလဲထကာ ကြားရသော အသံကိုပင် မယုံကြည်နိုင်သော မျက်နှာထားဖြင့်…
“ဘာ… ဘီဟိုက်ဘရန်ဒီ အစစ်၊ ကြံကြံဖန်ဖန်ဗျာ၊ မဟုတ်နိုင်တာကြီးကို၊ ဒီလိုအခါကြီးမှာ ခင်ဗျာ့ဟာ ဂျပိုးဈေးက ပလာညင်းကြီးထင်ပါရဲ့”
“ပလာညင်းဆိုတာ ဘာလဲကွ”
“ပလာညင်းဆိုတာ ပုလင်းညာပေါ့ဗျ”

ဦးတုတ်ပေါ၏ မျက်နှာမှာ ရုတ်တရက် တင်းမာခက်ထန်လာကာ…
“ဘာ…. မင်းက ငါ့ကို အညာမိရအောင် လူအ မှတ်လို့လား။ မင်းတိုင်ပင်အမတ် လုပ်လာတဲ့ အကောင်ကွ။ ဒီမှာကြည့်စမ်း၊ သံကြိုးခက်နဲ့ ထိပ်က ခဲပတ်တောင် မပွန်းသေးဘဲ”
ဒေါနှင့်မောနှင့် သွား၍ပေးလိုက်၏။

မောင်ဖြတ်စသည် သေသေချာချာ ကိုင်တွယ်ကြည့်ရင်း အမဲလိုက် ခွေးကဲ့သို့ ပုလင်းကို အနံ့ခံကြည့်ကာ ရုတ်တရက် ခေါင်းထောင်လာပြီး…
“ဟာ… အစစ်ပဲဗျို့ဘိုးဘိုး။ ဘယ်ကရခဲ့တာလဲ၊ တစ်လုံးတည်းလားဟင်၊ ဘယ်လောက်ပေးခဲ့ရသလဲ”
ဟု ဝမ်းသာအားရမေးမြန်းကာ ရဟန္တာတစ်ပါး ကိုယ်ထင်ပြသည်တွင် ဖူးမြင်ရသကဲ့သို့ ဦးတုတ်ပေါ၏မျက်နှာကို ငေးမော ကြည့်ရှုနေလေ၏။

ဤတွင် ဦးတုတ်ပေါမှာ အကျေနပ်ကြီး ကျေနပ်ကာ…
“ဟဲဟဲ.. ဟဲဟဲ… ငါ လူပါးပါကွ။ အစစ်မှန်းသိလို့ ဝယ်ခဲ့တာ။ ရေကူးကကွ၊ (၅၅)ကျပ်တည်း ပေးခဲ့ရတယ်။ နားမလည်တဲ့ ဟိန္ဒူကုလားဆီကမို့ပေါ့။ နားလည်တဲ့လူဆို ဘယ် တစ်ရာပေးတောင် ရမလဲကွ”
“ဘိုးဘိုးက သိပ်တော်တာပဲဟင်။ ကျွန်တော် ဘိုးဘိုးကို သိပ်ကျေးဇူးတင်တာပဲ။ ကျွန်တော် ဆေးလိုနေတာနဲ့ အဆင်သင့်ပဲ။ ကျွန်တော်သာ ဒါသောက်လိုက်ရရင်…”

မောင်ဖြတ်စ၏ စကားမဆုံးမီ ဦးတုတ်ပေါ၏ မျက်နှာမှာ ရုတ်တရက် တင်းမာခက်ထန်သွားပြန်ကာ…
“အောင်မာ… အောင်မာ မင်းလိုများ မှတ်နေလား။ ရာရာစစ ငါတောင် မသောက်ရက်ဘူး။ ငါ့သမီး မီးနေသည်သောက်ဖို့ ယူလာတာ ပေး… ပေး…”
မောင်ဖြတ်စက ပြန်၍ မပေးဘဲ…
“ဘိုးဘိုးကလည်းဗျာ အန်တီ့ဗိုက်က ခုမှ ခုနှစ်လလောက်ရှိသေးတာ။ သုံးလတောင် လိုသေးတာပဲ။ ကျွန်တော် ဒါသောက်လိုက်လို့ ကျန်းမာလာတော့ အစား ရှာပေးမှာပေါ့ဗျ”
“အောင်မာ… မင်းလိုကောင်မျိုးလား ရှာရမှာ။ သေတော့မလို ရောဂါနဲ့၊ ပေးပါကွာ”
“ဘိုးဘိုးကလည်း ရှာရင်ရမှာပေါ့ဗျ။ ဘိုးဘိုးဖို့ ကတ္တူးကတ္တံတံဆိပ်နှုတ်ခမ်းမွေးဆေးတောင် ရှာပေးပါဦးမယ်။ ဘုရားစူးပါစေ့။ ဘိုးဘိုး နှုတ်ခမ်းမွေး မီးလောင်ကတည်းက ကျွန်တော် တစ်နေ့မှ စိတ်မကောင်းဘူး။ မမာနေလို့သာ၊ မာရင် ကြာလှပြီ ရှာပေးတာ”
“ဟေ့ ဖြတ်စ ချဲ့မနေနဲ့ကွာ။ ပေးစမ်းပါ မြန်မြန်”
“ဘိုးဘိုးကလည်းဗျာ ပြပြီးမှတော့ ပေးပါတော့ဗျာ။ ခွေးဝမ်းသာအောင် လေလည်ပြသလို မလုပ်ပါနဲ့ဗျာ။ ငရဲကြီးတတ်ပါတယ်”

ဦးတုတ်ပေါသည် သည်းမခံနိုင်တော့ဘဲ…
“ပေးကွာ”
ဟု ဆိုကာ အတင်းလု၍ ထွက်သွားလေ၏။
မောင်ဖြတ်စမှာ အားမနိုင်၍ မာန်လျှော့လိုက်ရကာ…
“ချီး… အစဦးတော့ လာပြပြီးတော့ မပေးနိုင်ဘဲနဲ့၊ နှုတ်ခမ်းမွေးတင် မဟုတ်ဘူး၊ မျက်ခုံးမွေးကြီးပါ မီးရှို့ပစ်ဖို့ကောင်းတယ်။ ဒီဘရန်ဒီတော့လားကွာ၊ မရ ရအောင်ကို ခိုးသောက်မယ်”
ဟု မကြားတကြား ရေရွတ်လိုက်လေ၏။

ဦးတုတ်ပေါမှာ မိမိ ခဲရာခဲဆစ်ရလာခဲ့သော ဘရန်ဒီကို လာရောက်ပြသကာ အသားယူကြွားဝါသွားရ၍ ကျေနပ်သလောက် နဂိုဓာတ်ခံ ရင့်သန်ခဲ့သော မောင်ဖြတ်စမှာ မသက်သာရှိလှချေ၏။ အကြောင်းမူကား ညနေ (၆)နာရီတွင် ငါးကြော်၊ ဂွေးတောက်ရွတ်ဟင်းချိုနှင့် ဝင်းကြည် ထမင်းလာပို့သောအခါ ဖြတ်စမှာ မစားနိုင်၊ မသောက်နိုင် ဒုက္ခတွေ့ရလေ၏။

လက်ရေဆေးကာ ငါးကြော်ကို ဖဲ့ဝါးလိုက်ပြီး ထမင်းတစ်လုတ်စားလိုက်ရာ မျို၍မကျ ဟေ့ခနဲ လေလှန်လာလျက် ရင်ခံနေ၏။ ဂွေးတောက်ရွက် ဟင်းချိုကို သောက်ချလိုက်ရာ လည်ချောင်းထဲ၌ နင့်ခနဲ ဖြစ်သွားပြီး အကြောင်းမထူး။ နောက်ထပ် စားချင်စိတ်မရှိ။ “ဘာကြောင့်ပေလဲ”ဟု စဉ်းစားလိုက်ရာ ပုလင်းတစ်လုံး မျက်စိထဲ၌ ကွက်ခနဲ ပေါ်လာပြီး ဘရန်ဒီ… ဘရန်ဒီ… ဘရန်ဒီသောက်ချင်၍သာ ထမင်းမစားနိုင်ဖြစ်နေသည်ကို သူ တွေးမိလေ၏။

ဝမ်းထဲက ဟာသည်။ လေပျို့သည်။ ဆာသည်။ သို့သော် စားချင်စိတ်မရှိ။ လျှာလေးသည်။ သွားရည်စို၏။ ဇွန်း၊ ပန်းကန်ကိုင်လျှင် လက်တုန်နေ၏။ ဤကား ရေချိန် မကိုက်သေးသော အသောက်သမားတို့၏ ဒုက္ခတည်း။

မောင်ဖြတ်စသည် အိပ်ရာထဲ လဲသည်မှစ၍ အရက်ဖြတ်ထားခဲ့ရာ ငါးရက်မျှကြာသောအခါ နေနိုင်ထိုင်နိုင် ကျင့်သားရခဲ့ပြီး ဖြစ်ခဲ့၏။ ယခုမူ မီးခဲပြာဖုံးကို မှုတ်၍ပေးလိုက်သကဲ့သို့ ဦးတုတ်ပေါ၏ ကရော်တိုက်မှုကြောင့် ဝေဒနာဟောင်း ပြန်ပေါ်လာခြင်း ဖြစ်၏။ ခုနေအခါ၌ ဦးတုတ်ပေါ ထို ပုလင်းကိုင်၍ လာခဲ့ပါမူ ရိုက်၍ယူလိုက်မည်ဟု အောက်မေ့မိ၏။

သို့သော် ယခုအခါ၌ ထိုပုလင်းကိုရရန် ဘယ်နည်းနှင့်မှ မဖြစ်သေး။ သစ်မရမီစပ်ကြား ဝါးပေါင်းကွပ်မှပဲဟု ကြံမိကာ ဝင်းကြည်ကို အသာ လက်ပြခေါ်လိုက်၍ လမ်းထိပ် လန်ဘားခေါက်ဆွဲဆိုင်တွင် ချက်အရက်တစ်ပိုင်းနှင့် ဝက်နံကင် တစ်ကျပ်ဖိုးဝယ်ရန် ရေဘူးကလေးနှင့် လွှတ်လိုက်ရလေ၏။

ထိုချက်အရက်ရောက်မှပင် ထမင်းကို မြိန်ရှက်စွာ စားနိုင်၍ စားပြီး ဗိုက်လေးလေးရှိသည်နှင့် တုံးလုံးလှဲကာ အိပ်လိုက်လေ၏။

သူ မည်မျှကြာအောင် အိပ်ပျော်သွားသည် မသိ။
“ဒါဖြင့် ဟန်ကျတာပဲ။ ဒီဘရန်ဒီ ငါ့ဖို့ပေါ့”
ဟူသော သူ့ဦးလေး ကိုဘနိုင်၏ မူးသံကြီးကို ကြားမှ လန့်နိုးကာ ဘရန်ဒီအတွက် သူ့ဦးလေး သောက်ပစ်မည်ကို စိုးရိမ်တကြီး ဖြစ်မိလေ၏။ ထိုအခိုက် မမြခင်၏အသံ ပေါ်လာလေ၏။
“အောင်မလေး မလုပ်ပါနဲ့ရှင်။ ကျွန်မ မီးဖွားတော့ သောက်ဖို့ပါ။ ပေးပါ”
“ဟဲဟဲ… ဟဲဟဲ… မင်းတို့က ဘာသောက်သောက်ဖြစ်တာ။ သူ မီးဖွားဖို့က အရေးကြီးပါတယ်။ ပေးလိုက်ပါကွာ”
ဟု ဦးတုတ်ပေါ ပြောသံကိုပါ ကြားလိုက်ရ၏။

“ရော့… ရော့ ဒါဖြင့်ထားလိုက်၊ ကြောင်အိမ်ထဲထားလိုက်”
ဟု ဆိုကာ ပုလင်းပြန်ပေးပြီး အိမ်ရှေ့ခန်းသို့ ထွက်သွားလေ၏။
“ကိုနိုင် ဘယ်လဲ။ လာ ထမင်းစားလေ ထမင်းပြင်ပြီးပြီ”
“ဟာ ငါမစားတော့ဘူးကွာ ဗိုက်ပြည့်နေတယ်”
“ထမင်းဟင်းတွေ အလကားဖြစ်ကုန်တော့မယ်။ ကြက်သားကြော်၊ သရက်သီးသုပ်နဲ့ ဂွေးတောက်ရွက်ဟင်းချိုကလည်း ချိုကချိုနဲ့ လာစားလိုက်ပါ”
“မဆာတုန်းစား အပိုပေါ့ကွ။ ငါတစ်ရေးနိုးမှ စားမယ်။ ထားလိုက် ထားလိုက် အိပ်မယ်ကွာ။ မင်းတို့လည်း စောစောအိပ်ကြ”
ဟု ဆိုပြီး သူ၏ အိပ်ခန်းဆီသို့သွားရင်း မောင်ဖြတ်စ၏ အခန်းပေါက်တွင် ခေတ္တရပ်ပြီး..
“ဟေ့… ဖြတ်စ အိပ်နေပလား။ ဘယ့်နှယ်နေသေးလဲ။ မနေ့က ဆေးနဲ့ ဟန်ရဲ့လား”
“ဟန်ပါလိမ့်မယ် ထင်ပါရဲ့ဗျာ။ အကြောအခြင်တွေ ကိုက်နေတာပဲ”
“ —