အတုလုပ်ယူလို့မရနိုင်တဲ့ မိဘမေတ္တာ

အတုလုပ်ယူလို့မရနိုင်တဲ့ မိဘမေတ္တာ

ဇွန်လ၁၉ရက်နေ့ ဟာ..ဖခင်များနေ့ ပါ..သူငယ်ချင်းအတွက်မေ့ လျှော့နေမှာစိုးလို့ ဒိပိုစ့်လေးနဲ့ အသိပေးအကြောင်းပို့ ပါတယ်..။



သားသမီးတွေဟာ မိမိရဲ့မိတ်တွေ တစ်စုံတစ်ဦးတစ်ယောက် ကိုယ်ကြိုက်နှစ်သက်တဲ့
တန်ဖိုးရှိတဲ့ လက်ဆောင်ပစ္စည်းလေး လာပေးရင် အရမ်းကို
ကျေးဇူးတင်ကြပေမယ့်လည်း ကိုယ့်အပေါ်နှိုင်းဆမရသော
ချစ်ခြင်းမေတ္တာများစွာဖြင့် ပေးဆပ်ခဲ့ရတဲ့ (၀ါ) ငဲ့ညှာသနား
ဂရုဏာတရားကြီးမားစွာဖြင့် ဆက်ဆံခဲ့ကြတဲ့ မိဘနှစ်ပါးကိုကြတော့
နားလည်းသိတတ် လိမ္မာတဲ့စိတ်ထားနဲ့ ကျေးဇူးတင်ရမှန်း ထူးထူးခြားခြား
မဖြေစ်ပေါ်တတ်ကြဘူး။ ဒါဟာလည်း မိဘတွေအတွက် ဆုံးရှုံးနစ်နာမှု တစ်ခုလို့
ပြောရပါလိမ့်မယ်။


ဒါပေမယ့် စုန်ရေလိုမိဘများကတော့ သူတို့ကို ဘယ်လိုပုံစံမျိုးနဲ့ပဲမြင်မြင်
ဆက်ဆံကြ ဆက်ဆံကြ ကြံဖန်ပြီးတော့ ကျေနပ်ခွင့်လွှတ် ချစ်နေတတ်ကြပြန်ပါတယ်။
မိဘတွေဟာ သားသမီးတွေနဲ့ ပတ်သက်လာလျှင် လိမ္မာတော့ လိမ္မာလွန်းလို့
ချစ်လိုက်ရ၊ ဆိုးပြန်တော့လည်း အဆိုးကလေးမို့ ချစ်လိုက်ကြရ၊
ဘယ်လိုပုံစံမျိုးနဲ့ပဲနေနေ ဘယ်အသက်အရွယ်ပဲရောက်ရောက် ချစ်စရာကောင်းတဲ့
ကလေးတွေပဲလို့ မြင်နေမိတတ်ကြပါတယ်။


ဒါကြောင့်လည်း သားသမီးတွေက ကိုယ့်ရဲ့မိခင်တွေနဲ့ တွေ့လိုက်ရပြီဆိုလျှင်
မိမိမှာ ကလေးဘယ်နှစ်ယောက်ရှိ၍ နေစေကာမူ အဖေနဲ့အမေကို
ဆိုးချင်နွဲ့ချင်တတ်ကြ ပြန်ပါတယ်။


မိဘစိတ် မိဘမေတ္တာဟာ ဘယ်လိုစိတ်ထားမျိုးနဲ့မှ အတုလုပ်ယူလို့
မရနိုင်ကောင်းပါဘူး။ ကိုယ့်သားသမီးအပေါ် ချစ်တဲ့ သံယောဇဉ်မျိုးကို
မွေးထားတဲ့ မိဘနှစ်ပါးမှလွဲပြီး ဘယ်သူမှ အစားထိုးပြလို့ မရနိုင်ပါဘူး။
မိဘတိုင်း မိဘတိုင်းဟာ သားသမီးအပေးထားတဲ့ သံယောဇဉ်နဲ့
ချစ်ခြင်းမေတ္တာတရားတွေကို သူစိမ်းတစ်ယောက်က ယှဉ်ပြိုင်ခဲ့လျှင်
မြင့်မိုရ်တောင်ကို ဇီးစေ့နဲ့ပေါက်သလို ဖြစ်သွားပါလိမ့်မယ်။


မိဘက သားသမီးအပေါ် မုန်းတယ်ဆိုရင်တောင်မှ ဘေးလူရဲ့ အချစ်ထက် မြောက်မြားစွာ
သာပါလိမ့်မယ်။ မိဘကမုန်းတဲ့အမုန်းဟာ ဂရုဏာဒေါသနဲ့ယှဉ်တဲ့
အမုန်းမျိုးဖြစ်ပါတယ်။ သားသမီးအပေါ် ကောင်းစေချင်တဲ့ အပြုသဘောဆောင်တဲ့
စိတ်ထားလည်းဖြစ်ပါတယ်။ သားသမီးတိုင်းဟာ မိဘရဲ့စိတ်နေစိတ်ထား မိဘများဟာ
သားသမီးနဲ့ပတ်သက်လာလျှင် အမြဲတမ်း ခွင့်လွှတ်ပေးဆပ်နိုင်သော်လည်း
သားသမီးများကတော့ မိဘနှင့်ပတ်သက်လာလျှင် မိဘအပေါ်မှာ အနိုင်ယူ
ဗိုလ်ကျတတ်ကြပါတယ်။


မိဘများဟာ သားသမီးအပေါ် နှိုင်းဆမရလောက်အောင် ကြီးမားလှတဲ့
သံယောဇဉ်တွယ်တာမှုတွေနဲ့ ချစ်နေသမျှတော့ ခွင့်လွှတ်လိုက်လျော
အနစ်နာခံကြပါလိမ့်ဦးမည်။ ဒါဟာလည်း မိဘတိုင်းရဲ့ ပင်ကိုယ်
စိတ်ဓါတ်ပင်ဖြစ်နေလေတော့ သားသမီးနေရာက ဘယ်သဘောပေါက်နားလည်နိုင်ပါ့မလဲ။

ဒါ့ကြောင့်လည်း သားသမီးတွေရဲ့ စိတ်ထဲမှာ ကိုယ့်မိဘအပေါ် ကိုယ်ဆိုးတာလဲ
ကိုယ့်မိဘ ပိုက်ဆံကိုယ်ဖြုန်းတာပဲ စဉ်းစားနေစရာ လိုလို့လား။
စဉ်းစားမှုလည်း မရှိတတ်ကြပါဘူး။ ကျေးဇူးတရားတွေကို မဆင်ခြင်မိကြတော့
သားသမီးတွေဟာ မိဘတွေကို ပြန်ပြောကြ၊ ပြန်အော်ကြ၊ စော်ကားကြ၊
ကျေးဇူးကန်းကြနဲ့၊ အသေးအဖွဲကိစ္စလေးတွေမှအစ မိဘကိုစိတ်ဆင်းရဲအောင်
လုပ်တတ်ကြပြန်ပါတယ်။ ဒါတွေကို သတိထားမကြည့်မိရင်တော့
အပြစ်သင့်နေပါသလားလို့ မတွေးမိကြတော့ပါဘူး။


မှတ်ချက်။         ။တောင်တွင်းအရှင်ဏ္ဍဒ္ဓိပါလ
အညတရဘိက္ခု၏သားသမီးနှင့်မိဘငြိမ်းချမ်းရေး (သားသမီးနှင့်မိဘ တကယ့်ဖြစ်ရပ်မှန်များ)
စာအုပ်မှ ကူးယူဖော်ပြသည်။  ။


တရားကိုလှူဒါန်းပူဆော်ပါသည်။
ခင်မင်လေးစားသော

ရွှေအိမ်စည်https://www.facebook.com/shweaeimsi


---------------------------------------------------------------------------------------------
ပိုစ့်အဟောင်းများပြန်လည်ဖတ်ရှုလိုပါက ရွှေအိမ်စည် စာကြည့်တိုက်  http://drshweeaimsi.blogspot.com/ တွင်ဝင်ရောက်ဖတ်ရှု့ နိူင်ပါသည်။
ခင်မင်လေးစားလျှက်
ရွှေအိမ်စည်